Bijîşkê ku li Rihayê di beşa lezgîn de dixebitî di encama êrîşa xizmên nexweş de pozê wî şikest. Bûyer doh êvarê li Nexweşxaneya Perwerde û Lêkolînê ya Rihayê pêk hat. Hat îdiakirin ku dema Bijîşkê Pispor Orhan Hagî nexweşek tedawî dikir xizmê nexweşekî din tê û dibêje, "Nexweşê min rewşa wî xerabtir e, pêşî li nexweşê min binêre.”

Nîqaşa ku di navbera bijîşk û xizmên nexweş de dest pê kir veguherî êrîşê. Piştî bûyerê hat dîyarkirin ku polîsan êrîşkar binçav kirine. Derbarê bûyerê de Serokê Şaxa Odeya Tabîban a Rihayê bijîşk Bûlût Ezer daxuyanî da û wiha got, “Ger qanûna tundîyê ya di tenduristîyê de bi bandor were tetbîqkirin, divê ev kes bê darizandin.

Me gelek caran diyar kirÎye ku qanûnên hatine derxistin têrê nakin û bi navê reforma spî hewl nade ku pêşî li tundîyê bigire. Ev yek ji encamên bûyerên qewimî ye."

Her wiha Ezer da zanîn ku emelîyata Orhan Hagî serkeftî derbas bûye û wiha got: “Rewşa wî ber bi başbûnê ve diçe, lê ji alîyê derûnî ve di bin bandorê de ye. Em êrîşê şermezar dikin û ji bijîşkê xwe re şîfayê dixwazin." Hat hînbûn ku Orhan Hagî di 17ê Hezîrana 2022an de jî, ji alîyê xizmên nexweşekî ve rastê êrîşekê hatîye.