Parêzerê malbata Hakan Arslan ku 2’yê Berfanbara 2015’an de di pêvajoya qedexeyên derketina derveyê ya Sûrê de jîyana xwe ji dest dabû û hestîyê wî di nav tûrikekî de dabûn malbata wî, bertek nîşanî vê rewşê da û dîyar kir ku ew ê vê pêvajoya hiqûqî bicidîyet bişopînin.

Parêzerê malbata Arslan Ferhat Kilinç destnîşan kir ku li gor mewzûatê divê hestî di nav tabûtekî de radestî malbatê hatiba kirin lê ew wek mûameleya “emaneta edlî” di nav tûrikekî de radestî malbatê kirin. Her wiha Kilinç dîyar kir ku her çi kes ji mirina Hakan Arslan berpirsîyar be divê were tespîtkirin û wiha axaftina xwe domand: “Em ê li rapora otopsîyê ya Hakan Arslan binêrin û dû re derbarê dayîna hestîyên wî yên di nav tûrikê û pêvajoyên dîtir ên hiqûqî de tiştên bên kirin bînin cih.”